Eguraldia
Joxe Landaren iragarpena
Gaurko eguraldia

TENPERATURA BERDINTSU, BAINA DOTOREZIAK IRABAZI

Haize leuna ekialdetik dela, dotoreziak irabazi egingo du eta epeltasuna berdintsu. Arratsaldean ipar-ekialdetik haize leuna, baina aldaketatxo horrek ez du ezer suposatuko. Eguratsaren hezetasuna gutxituaz giroaren goxotasuna bikain mantenduko da, tenperatura igo ez arren. Euskal Herri osoa tankera berdintsuan, ongi kokaturiko antizikloiaren magalean borraskak urruti direla. Eguraldi on iraunkorra, hain zuzen, hego haize boladaren atarian. Oro har eguraldi polita eta giro atsegina nahiz eta epeltasuna asko nabarmendu ez.

Bihar

ATZOKO TANKERARI EUTSIZ, GIRO ONA

Ez da batere aldatuko eguraldiaren martxa, ekialdeko haize leunaren igurtziarekin goxatuta. Hodei mehe batzuk zeru sabaian baina oskarbia nagusi dela eguzkia bistan eta tenperatura goxo. Antizikloi potxolo horrek ederki babestuko gaitu Atlantikoko borraska pixka bat hurbildu arren. Euskal Herri osoan tankera berdintsua edukiko du. Ihintza apur bat leku aproposetan, baina ez izotz eta ez elur lurralde osoan. Eutsi egingo dio onetik onerako martxa honi eta hego haizea apur bat mugitzen hasiko da.

Joxe Landa. (Gorka RUBIO / ARGAZKI PRESS)