Eguraldia
Joxe Landaren iragarpena
Gaurko eguraldia

HIRU EGUN OSO ONAK ETA BESTEAK KASKARRAK

Gaurtik hasita eguraldiaren onaldia martxan. Egunsentian ihintza eta behe laino batzuk leku aproposetan eta fresko samar, baina haizearen hego ukituak segituan konponduko ditu akats txiki horiek eta tenperatura nabarmen igoko da ostarteak nagusituz. Beraz, dotorezia polita eta goxotasun nabarmena Euskal Herri osoan. Antizikloiaren kokapenak ekarriko du hobekuntza hau egun batzuetarako. Udaberri giroa, hain zuzen, itxura politarekin eta giro atseginarekin.

Bihar

Atlantikoko depresioa hurbildu eta antizikloiaren isobarak jita hobean jarriz, ederki nabarituko dugu giroaren hobetzeko joera. Haizea hegotik leun eta goxo, airearen hezetasuna gutxituaz. Hodei sare batzuk zeru sabaian batere goibeldu gabe eta tenperatura pixka bat gorago. Euskal Herri osoan nabarmenduko da hobekuntza hau, baina ipar partean gehiago behe laino eta ihintzik gabe.

Joxe Landa. (Gorka RUBIO / ARGAZKI PRESS)